منتديات أعز الناس - صورة من زمان

قـبـل الـمـغربيــة مــع خالـة خـــيرية *** تـزهــــم وتـنـادي إنــــتـي فـيـن يـــابـدريـة
بـدريـة فــي الـــسـطـــوح مــع عـــلويـة***يــفرشــو الــطراريـح ويـخـشـخـشو الـنـامـوسة

يالله يـابنـت إنـتـي وهيـا بــسرعـــة شـويـة***حـاضـر يــاأمـي دقـايـق ونـخلـص مـن الـقـضـيـة
واد يـــا أسـعــد فـيـن أخوانـك الــبـقــية***فــي الـــزقـاق بـيـلـعــبــو عــسكر وحرامــيــة

أزهـم عـلـيــهـم يـطـلـعــو لا تـجــيـهـم الـجـنـيـة***صلي عـالـنـبـي يـاأمي دي ساعـة مـغـربـية
صــدقـة يـا عـــبـاااس أطــلــعــو بــلا أزيـة***طيـب طـالـعـيـن خـلاص مـع ســتي مـهديــة

مهديـة لـخيـرية أولادك هدول فـرفوشـة***زفـوني في الدرج يـقـولـولـي يـاسـتـنـا ياعـسـلـيـة
عــبـاس مــجـروح فـي رجــلو بقزازة مـرمية***وصدقة ببـجامـة مقلـمة وصخة زيي الميكانـيكية

خيـرية .. إيــش هادا حـسبي الله عليكم شقاويـة***مـهديـة ...لا تضربيـهم عـشاني وإنتي رضية
حــاضر ياأمي عـشانك بـس المرة ديـة***يالله قدامي إنـت وهو أتــروشــو مــــن الحـنـفـيـة

وإنـتي يـا أمي أجـلــسي جـمب الـمـصـلـيـة***عـشان إذا أدن تــــصـلي الــمغربية
وإنتو يــابنات يالله تــعالو نـــسوي الـمـقـلـيــة***ونـزبـط زلطة الـــحـومر والـفــلــفــلــيــة

بـعد المـغـربـيـة .ياولـد ياسـاتر طــريق ياخيـرية***أتـفـضـل يبو اسعد مـافي غير عمتك مـهـديــة
كـيـفك يـاعمة نورتي الـبـيت يــاعودة وعـنـبرية***تـعيش ياجوز بـنتي كلك ذوق ومـفـهـومـيــة

هيا سمو بـالـرحمن ونـقـنـقــو من الـمـقـلـيـة***ونونو نونو لــقمــة هــنــيـــة تــكــفـــي مـــيــــة
أسعـد يــــوشوش أبوه يبغى هديــــة***ماشاء الله نجـح وأتـخــــرج مـــــــن الـثــانــويــة

أبشر يــاولدي بـس تجي فلوس الإكـرامية***ولايـهـمك يـبـويا مافي مـشـكـلة حـصـبر شوية
يـاواد عباس إيـشبـهـا كدا رجلك ملويــة***دخلت فـيهــا قزازة يبويــا من الـعـصرية

تــاني مرة فــتح عــينك لا أخرملك هيه***ولا اشوفكم تلعـبـو حـفـايا ترى تاكـلـكـم التكـرونـيـة
بــدريــة .. يـبـويــا فين حـتـوديـنـا هادي الـصـيـفـيـة***والله يابنتي كالعادة الـطايـف حي البخارية

الله يـسعدك يبويا نبغى أبها الـبــهية***يـابنــتي أبها بــعــيدة مـــرررررة وســفــريـــة
خلاص اللي تشوفو يا أغلى أب في الدنيا ***ديه بنت ياعلويـة ناوليني الـكمر حقي والـسديرية

أنا خارج دحين ياخيـرية رايح الـشامية***أودي صك الــوقف حـق بيت السـلـيـمـانـيـة
خـلي الأولاد يسبقوني للحرم تحت المكبريـة***عـشان نـصلي الـعـشا ونكـسـب الفرض سوية

بعد الـعشا وفي الـسطوح عند الـمـشربـيـة***خيرية تفت العيش في الحليب وبدرية مسلقحة متحنية
هاتي ياعلوية الجبنة البلدي والحلاوة الطحينية***وكمان كم بيضة نسوي شكشوكة في الصينية

لمـة حلوة وظريفة وعــيلة عفوية***أتعشو وعـليـهم بالـخـير يدورو عالنـامـوسـيـة
عشان يــصــحــو بدري مع أدان الـفجريــة***لاسهر لاكسل يـومـهــم كله نــشاط وحـيويــة

]فينك يا ايام زمان تشوفي حالناوالفوضجية***مانعرف راصنا من رجلنا وحياتنا سارت ملوخية