|
(( من أطرف وأجمل ما قرأت ))
السلام عليكم ورحمة الله وبركاته غالباً ما تكون القصائد التي تتناول الجانب الإجتماعي هي الأكثر رواجاً وبقاءً وتداولاً بين الناس لفتراتٍ طويلةٍ من الزمن لنقرأ سوياً قصة هذا الشاب الذي ذهب ليخطب من عمه طالباً الزواج من إبنته والشروط الميسّرة البسيطة السهلة التي قابلها به عمه لإتمام وقبول هذا الزواج للأسف حتى هذه اللحظة لم أستطع الحصول على إسم الشاعر وقتاً ممتعاً أتمناه لكم ^_* سبحان من يرزق بتوع الملاييـن ------------------ الرازق اللي مايخيب الرجـا بـه لي عم عنده معـرضٍ للصواليـن -------------------أموت واعرف بس من وين جابـه وإذا سألته قـال بعـت الدكاكيـن ------------------ما يدري إني ماهضمت الإجابـه الشاهد إني رحت له قبـل يوميـن ---------------------في قصره العامـر ودقيـت بابـه قال ارحب ارحب عدّ ورد البساتين ---------------------يا مرحبا باللـي لفـىَ يـا هلابـه قلت البقا عـدّ النفـل والرياحيـن -----------------يا شيخ شمل اهل الكرم والذرابـه قال اسلم الله يحفظك لي من العين -----------------وآمر أوامر حضرتـك مستجابـه قلت الصراحة طالبٍ قرب غاليـن -------------------ودي تزوجنـي كريمتـك يـابـه ثنّى وقال اهليـن والله وسهليـن ----------------والكون ترخص لاجل عينك رقابـه لكن ترى عندي شـروط وقوانيـن ----------------قلت اشرط اشرط يا حبيب الغلابـه قال أولاً مهر العروسـة ثمانيـن ----------------غير الرسوم وغير حق العصابـه والثانية عمك يبي منـك سبعيـن ------------------رسم الأبـوّة والنسـب والقرابـه وام العروسة حقها منـك ستيـن -----------------عشانها ست الحسـن والمهابـه واخوانها كل ٍ يبي منـك خمسيـن ------------------عداً ونقـداً تنـدرج فـي حسابـه وخواتها الخمس اعطهن من ثلاثين -----------------عشان تتوثـّق عـروق النسابـه وتجيب طقم عيار واحد وعشريـن ---------------وخاتم من الماس المصفى ترابـه واكياس متروسة كعوب وفساتيـن -----------------ألوانهـا واشكالهـا مـا تشابـه وموتر بسواقـه وفيـلاّ بدوريـن ----------------أثاثهـا مـن بطرتـه ينحكـى بـه واحجز لنا قاعة بقصر السلاطيـن ---------------واحجز بهـا رقاصتيـن وربابـه وامنع من القاعه حضور البزارين ----------------واعزم أميـر المنطقـة بالنيابـه هذي الشروط اللي على بالي الحين ---------------وذكّرني اللي ما حسبنـا حسابـه قلت اذكر الله يا عـدوّ المساكيـن ------------------واستغفـره لا يبتلـيـك بعـذابـه الظاهر إنك منت عارف أنا ميـن ----------------أنا لو ارقىَ فـوق متـن السحابـه ما جبت حتى نص درزن مواعيـن --------------واضحك بكيفك واعتبرهـا دعابـه شروطكم هذي شـروط المجانيـن ---------------شروطكم شغـل ابتـزاز ونهابـه شروطكم تقصم ظهـور البعاريـن -----------------شروطكـم هــمٍّ وغـمّ وكآبـه شروطكم والله سيوف وسكاكيـن --------------تذبح بنات المجتمع مـع شبابـه وين الرضىَ والعطف واليسر واللين ----------------اللي ذكرهـا الله بمحكـم كتابـه وين الصفات اللي أمَرْنا بها الديـن ------------ وين اختفى نهج النبي والصحابـه يا عم جعل اللي خلقنا من الطيـن ----------------يرد عقلك مـن خطـاه لصوابـه ويجعل نصيبي عند غيرك قل آمين ------------ويحسن عزا الصابر ويجزل ثوابه قال انت لو فكرت تفكير صاحيـن -------------ما شفت في مجمل شروطي غرابه حنا بعصـر العولمـة والمزاييـن ------------ ماهو بـعصر الفلسفة والخطابـه الناس تسعى للرتـب والنياشيـن ---------------وانت اهتمامك بالشعـر والكتابـه والشعر ماينفعك لو هو دواويـن ----------------ما دام جيبك مثـل بيـت الخرابـه يا بوك لا تسمع كلام المصاخيـن ------------واسأل مجرب عاش في وسط غابه قلت الله اكبر يامحـرّر فلسطيـن --------------من يسمعك يحسبك ذيـب الذيابـه تراك شايب راس مالـك رياليـن ------------- والبنت ما تسوى جنـاح الذبابـه قال انقلع مالت على وجهك الشين ----------------لا عاد اشوفـك عندنـا يالزلابـه قلت ابشر ابشر لكن الباب من وين -------------واقفيت من عنده على صوت بابـه |
لاشك أن الشاعر صور لنا قصة مأساوية بأبياته الرائعة وصور لنا متطلبات عمه التعجيزية .. وإن كانت الصورة مبالغ فيها إلا أنه بات من المعروف انتشار موضوع غلاء المهور في مجتمعنا والطلبات الجائرة .. إنتقاء رائع من إنسان أروع .. دمت ودام لنا جميل اختيارك .. |
اقتباس:
وقسم ..قسم !!! ماراح يحصل بنت تقبل بيه وهو مو قادر يجيب ( درزن مواعيـن ) تسلم أخوي ( أبو سامي ) على طرح هذي القصيدة الممتعة .. وياليت في المرة الجاية يكون صاحب القصيدة قادر يفتح بيت حتى ولو كان من طين ... عشان نقول أنه على حق .. هههههههههههههههههههههههه.. والعذر والسموحه .. هذا اللي جا في خاطري من تعليق http://www.a3zz.net/vb/images/icons/icon10.gif... حتى إنه جاء داخل الاقتباس ... دمت بحفظ الله ... |
يعطيك العافييييه على الطرح الذي يحاكي واقع الحال بغض النظر عن مبالغة الشاعر
واضيييف انو رد زارع الورد جدا متميز ومقنع هههههههههههههه بارك الله فيكم جميعا تقبل طلتي (^_^) |
يعطيكم العافيه جميعاً على مداخلاتكم العطره تعقيباً على مداخلة أخي أبو أسامه انا معك نسبياً فيما ذكرته أستاذي الكريم من تعليق ووضع النقاط على الحروف من خلال إقتباساتك النيرة ولكن من وجهة نظري المتواضعة بأن الشاعر لقاء ما تم ذكره من شروط تفوق الخيال وتتعدى أفق الواقع من قبل عمه قال الشاعر بأنه لو يرقى فوق متن السحابه ما جاب لو حتى نص درزن مواعين باعتقادي أنه من منطلق ذكر الشيء بالشيء وهي المبالغة هنا طالما ان العم قد شطح وبالغ كثيراً في الطلبات والشروط التحجيرية إن صح التعبير وليست التعجيزيه ههههههههههه حق له أن يبالغ في التواضع وعدم الإمكانية ولو على نص درزن مواعين ولا ننسى بانه سبق وأن تطرق في قصيدته إلى أن هذه الشروط ليست سوى ابتزاز ونهب وكأن لسان حاله يقول لا تطمع فيما لدي فأنا يقظ ومنتبه لك ولست ممن يتم ابتزازهم او الضحك عليهم بسهولة كما تتوقع يا عمّي هههههههههه أسعدتني مداخلاتكم العطرة تقبلوا جميعاً تحيتي وجل تقديري . |
أتفق معاك أخي الغالي ( أبو سامي ) في مسألة المبالغة التي ذكرت ...
ولكن إذا كان قوله : ( أنا لو ارقىَ فـوق متـن السحابـه ما جبت حتى نص درزن مواعيـن) من باب المبالغة ، في مقابل مبالغته في تصوير طلبات عمه وشروطه... فهذا يعني أن القصيدة غرقت في مبالغات أضاعت القضية التي أراد أن يصورها وهي ( غلاء المهور وتعنت آباء الفتيات في وجوه الخطاب( لأن غلاء المهور قضية اجتماعية فكان عليه أن يتزن في تصويره ويقدم صورة مقبولة للشاب حسن النية في تقدمه للزواج ... لا أن يقابل طلبات عمه بالعجز الكامل حتى عن أبسط الأشياء ، حتى وإن كان من باب المبالغة ... فيبدولي أن ملامح النص تعطي أولوية لكون الشاب المتقدم للخطبة غير قادر - حتى للطلبات العادية في الزواج التقليدي - وأنه ربما دخل على طمع .. وليس العكس ... فالقصيدة صورت غنى عمه مقابل فقره وضعف إمكانياته... ومما يؤكد ذلك ، قوله على لسان عمه : (والشعر ماينفعك لو هو دواويـن ----------------ما دام جيبك مثـل بيـت الخرابـه ) فهو يؤكد قوله السابق : (قوله : ( أنا لو ارقىَ فـوق متـن السحابـه ما جبت حتى نص درزن مواعيـن ) فقد قدم ما يدل على عجره التام ، وعلى لسان عمه أكد هذه الحقيقة .. فمهما قلنا أنها من باب المبالغة ، لكنها تضعف مصداقية القضية ... وتجعل القصيدة أقرب ما يكون لتصوير شاب حاط عينه على ثروة عمه : (-أموت واعرف بس من وين جابـه ) ويأمل أن يرأف عمه بحاله : (أنا لو ارقىَ فـوق متـن السحابـه ما جبت حتى نص درزن مواعيـن ) فيشيله من الأرض شيل ويزوجه بنته ويغدق عليه من (معـرضٍ الصواليـن ) هههههههههههههههههههه .. لكن عمه كان أعرف الناس بابن أخيه , وأنه مجرد عاطل كسول ، مو حق زواج وتحمل مسؤولية ، عشان كذا صمعه (شـروط المجانيـن ) عن جد.. يبي يطفشه .. وعطاه درس في قوله : ( الناس تسعى للرتـب والنياشيـن ---------------وانت اهتمامك بالشعـر والكتابـه والشعر ماينفعك لو هو دواويـن ----------------ما دام جيبك مثـل بيـت الخرابـه يا بوك لا تسمع كلام المصاخيـن ------------واسأل مجرب عاش في وسط غابه) والله نصيحة طيبة ... لكن شوف رده .. اللي يدل على نواياه الغير حسنة لما عرف أنه انفضح وما تحقق أمله : (قلت الله اكبر يامحـرّر فلسطيـن --------------من يسمعك يحسبك ذيـب الذيابـه تراك شايب راس مالـك رياليـن -------------والبنت ما تسوى جنـاح الذبابـه ) هذا رده على عمه ... الحين صار عمه ..[ شايب راس ماله ريالين ].. وبنت عمه ، [ ما تسوى جناح البعوضة ] ... طيب إذا كانت بنت عمه مثل ما وصف ، ليه جاء يخطب ... وإلا من باب ( واللي ما يطول العنب حامض ٍ عنه يقول؟؟!! ) ومع ذلك أتفق معاك أخوي ( أبو سامي ) أن الشاعر حاول يوضف قصيدته في قضية غلاء المهور ..حين قال : (شروطكم والله سيوف وسكاكيـن --------------تذبح بنات المجتمع مـع شبابـه وين الرضىَ والعطف واليسر واللين ----------------اللي ذكرهـا الله بمحكـم كتابـه ) بس أحس أنه يحاول يرقع ترقيع ..ههههههههههههههههههههههه ... وعشان أصالحك أخوي ( أبو سامي ) خذ هذي القصيدة في الاتجاه نفسه وهذي المرة فصيحة عشان نعدل الكفة ...نبطي + فصيح .. للشاعر المبدع / حسين أحمد النجمي ( عاشق الفل ) كما يطلق على نفسه في المنتديات : عجباً أرى ومصيبة ً ما أسمعُ ..... هلْ بعد هذا في الزواج سأطمعُ طلبوا المئات ِ من الألوف لمهرهم ..... وحليها ذهبٌ فماذا أصنــعُ سيصيبني هرمُ الشيوخ ِ ولم أزلْ ..... من أجل ِ هذا ، للدراهم ِ أجمعُ حتى كأني إنْ ظفرت َ بقربها ....... نلتُ الثريا في سماها تلمع ُ فالأمُ تذبحني وتشربُ من دمي ....... وأبٌ طلوبٌ طامعٌ لا يشبعُ لاهمً إلا ، كم ستدفعُ مهرها ؟؟ ....... فالمالُ ليس سواه دوماً ينفعُ كم فلة ٍ تبني وكم سيارةٍ ....... تشري لها فالحـُبُ مالاً يَزرعُ وكأن سنة َ سيدي خير الورى ....... قد أصبحتْ ببلادنا لا تسمع ُ لله أشكو ما يعاني جيلنا .......والقلبُ محزونٌ وعيني تدمعُ هذا بلاغٌ صادقٌ من واقع ٍ....... ياأيها الآباءُ هلْ مَــنْ يسمعُ؟؟!! مع كل التحايا العطرة...... |
ههههههههههههههههههههههههههههه
الله يسعدك ويحفظك ويحفظ لك فكرك وقلمك أستاذي الكريم أبو أسامه انا معك في كثير مما قمت بالتعقيب عليه مؤخراً وأرى أن خطأه الفادح عندما قام بالتهكم على عمه وابنته بعدما اصطدم بجدار تلك الشروط - ولكن قد يكون ذلك ردة فعلٍ منه تناولها بالغضب تحت طائلة ( هي خاربه خاربه خلينا نعميها ) ههههههههههه أشكرك أستاذي على سعة صدرك واحتوائك الموضوع بهذه الأريحية المفعمة باللطافة لا عدمتك كما أشكرك على ما أضفت من أبيات للشاعر النجمي فـ صح لسانه وسلم بنانه لك فائق التحية وجل التقدير . |
| الساعة الآن 01:19 PM. |
Powered by vBulletin® Version 3.8.9
Copyright ©2000 - 2024, Jelsoft Enterprises Ltd.