عرض مشاركة واحدة
قديم 10-18-2016, 11:38 PM   #4
محمدبن عبدالعزيز


الصورة الرمزية محمدبن عبدالعزيز
محمدبن عبدالعزيز غير متواجد حالياً

بيانات اضافيه [ + ]
 رقم العضوية : 3154
 تاريخ التسجيل :  Jan 2016
 أخر زيارة : 02-10-2023 (11:02 PM)
 المشاركات : 5,505 [ + ]
 التقييم :  220
 MMS ~
MMS ~
لوني المفضل : Cadetblue
افتراضي



هاذي سالفةٍ لـ الشاعر // عبدالله بن علي بن دويرج .
وهو من شعراء السر من أهل بلدة جفن توفي عام 1356
هالشاعر يوم كان شباب كان يشتغل في النخيل وبعد ما كبر صار يشتغل في البناء والطين
هذا الشاعر عاش في منطقة ( السر )
و تزوج في أول شبابه وجاه ولد ولا قعد عنده ,
راح يشتغل في المنطقة الشرقية واستقر هناك ,
و بعد ذلك توفت حرمته ، و جلس هالرجال فتره ما عنده حرمه ولا احد ٍ يواليه
الى هاك الحرمة الصالحة الدينه اللي متوفي عنها رجلها
و تقدم لها عبدالله بن دويرج و خذها وهو على كبر
و يوم خذها ولاها حرمة ذربه وفيها دين وضفره بالحيل
وبعد فتره ..رزقه الله هاك البنية من هالمره
وبدت البنية تكبر ودائماَ البنت لها حنان خاص من أبوها
والبنت دائماَ الطف واحنّ من الولد ،المهم كبرت البنت ,
وصار عمرها 16وصارت هي اللي تقهوي أبوها و تطيبه اذا بغا يروح المسجد وتولم بشته
عاد صار أبوها معتمد عليها في كل شي ,
الحاصل يوم جاء يوم من الأيام الله لا يعيد الشر
ولاها أيام شتاء جاء هو بعد صلاة العشاء
ولا حرمته شابة ٍ الجمر وحاطه عليه مركب جنبه الدله وبريق الحليب
قالن : تبي نصب لك قهوة وإلا حليب قال اللي تبون ,
قامت الأم وصبت له حليب يوم رشف الحليب ..
قال : كأنه بارد قالت !!؟
قلت الحرمه : ابشر نسخنه هالحين .
قال الابو لـ بنته : قومي وأنا أبوك روحي جيبي لنا حطب
عويدات رمث ولا تجيبين طوال مره جيبي عويدات تدخل تحت المركب
قامت البنت وخذت السراج وراحت للحوش تبي تلقط حطب
و قامت تلقط عويدات على قول أبوها تدخل تحت المركب والى توها ملقطةٍ ثلاث أو أربع
وتلقى هاك العود طويل بالحيل جت تبي تكسره على ركبتها
وطق السراج وينجعف وينكب قازه ويطفي !!
قامت هي تلمس في الحطب يوم تلمست يا دافع البلاء وتقرصها حيه مع أصبعها
وتجي معوده و تصبر وتألم ماتبي تبين لابوها وأمها
ماتبي تزعجهم << ( والله لوها من بنات اليوم كان تفضح الدنيا بالسانها )
المهم راح أول الليل ولا يوم كاد عليها الوجع وقامت تقلب وتسدح مع الألم
وتفزع الأم ويحطون هاك التمرة وعجين تمر يبغونه يفيد
يوم .. يومين .. ويوم جاء نهار ثالث وهي توفى !! الله يرحمها .
ولا يوم أنحشت كبد الأبو وقعد أربعة أشهر مثل الجرح قاطب على صدره
كل ما ذكرها يتزفر هاك الزفرة الله يجيركم

... أن ناظر الباب هذا تذكرها يوم أنها واقفه عنده
... وتذكريومها تقلط له الغداء
... ويومها تقهويه
وتغورق عيونه من الدموع ، ويتهيض ويقول هالابيات ، وهي من قصيد الرثاء



عفى الله عن عين ٍ حلى النوم جافيها
كراها قليل وذارف الدمع محفيها

إلى قلت : الا ياعين هيدي و هودي
جرى دمعها الصافي وهلت عباريها

تبين فروع الصبح ما ذاقت الكرى
ولا لوم عين ٍ فارقت شوف غاليها !!

ولا زل يوم أو ليله ما تعبرت
على النوح أعزيها ولاني بقاويها

وأنا في رجا ، جزل العطا ، عالم الخفى
يلطف بحال ٍ خافي الهم باريها

على نور عيني لب قلبي ومهجتي
تحن الضماير كل ما حلّ طاريها

حنين الخلوج اللي عن الظير فاختت
إلى غاب عنها ساعة ٍ ما يباريها

وأنا كيف ما أبكي طفلة ٍ غضة الصبا
حورية ٍ سبحان رب ٍ مسويها

نشت بالهدى والدين والحق والبها
و لو طالت الأيام ما نيب ناسيها

فيها طبوع ٍ كاملات حميده
حنون على الجيران و صال عانيها

عفيفة نظيفة جيب ما داست الخطا
ولا هوجست بالمذهب اللي يرديها

حشا ما بها من خافي العيب ذارب
سوى حشمة الوالد فهذا فهو فيها !!

كمل عمرها ثنتين مع عشر وأربع
سوى محترمها تسفهه لو يحاكيها

خذت هجنة ٍ فالبيت عندى قليله
أمانه و خذها الخير اللي عطانيها

فلا نيب جزاع فلا شك ولعه
( أعرف الأمانة ما لها غير راعيها )

فيا سامع دعواي في مظلم الدجى
تمحي خطاياها وتثبت حسانيها

وتجعل لها في جنة الخلد منزل
وتقطف ثمر جنات طيبة وتجنيها

وتعوضها فيما قصر من شبابها
برضاك ياخلاقها وأنت واليها

ألهي ودودي دعوتي تستجيبها
على النفس كلها من غلاها مبديها

ألا وتكدر خاطري من فراقها
ولو لا غلاها ما تكلفت راثيها

سمية دمع المزن في غبة البحر
سوى البنك ما يدرك ثمنها ويشريها

وأن مابي إلايوم يطري سميها
عفى الله عن عين حلا النوم جافيها

وصلو على من لاافترى سيد الورى
عدد ما جرى من رايح المزن واديها


 


رد مع اقتباس