|
شي واضح ما بدا فيه الرتوش ابتدى بالعقل ماهو بالهواش العلوم اللي لفتنا فالدشوش خلت العاقل من القصه يداش طاش وإلا جعل عمره ما يطوش حقنة الفكر الخبيث وسم طاش ما ذبحنا غير تصريح الجحوش وماش من زود الغبينه ماش ماش |
شاشة التلفاز كل مافيها غشاش
ماتعرض شيء الا مرتش بالرتوش سود الوجيه مبيضه بمعسول النقاش ترسم البسمه على وجه بشوش والقلب اسود مرتع للحيايا والاوباش وان صدمته بالحق صار مربوش ماله حجة الا بالزعيق والهواش ينهق نهيق حمار مربوط بحوش |
شي واضح ما يبي يمكن ويمكن بالظنون افهموا يا هل العقيده واسمعوا هذا السؤال يا مدورة السلام اللي تبونه وش تبون ؟ دام قول الله يدنّس في سجون الاحتلال وين راحت غيرة الفاروق والغيره تكون في نهار ٍ مثل هذا مابها شك وجدال |
لا صار يخلط بين حل وحراما
وش عاد باقي يا عريب الجدودي تبث منهجها بشرق ٍ وشاما شرذمة ٍ تنقاد لا ما تقودي في صفها تقسيم ألا انقساما والبيت ما يبني بليا عمودي ولّي يا دنيا شاب منها الغلاما وما فات حي ويمكن انّه يعودي والله يا وقت ٍ يذل النشاما يوم الردي رزته حمر النقودي |
يعين الله يادنيا تسوق ايّامها الأحزان يعين الله وانتي مثل قفل ٍ ضاع مفتاحه يعين الله وجروحي لها في كلّ وقتٍ شان كذوب اللي يقول ان الزمن بيداوي جراحه |
هذه دنيا قليلة الراحه
كثيرة الهم والاشجان مادامت لحي بها افراحه متقلبة بين خوف وامان |
نعلى دوم كعلو السحاب اللى بامطار خلاها نماء |
السحاب الي تعلى وسما بالسما
حنا بالعلو نطاول علو السحاب |
بيني وبينك تستطيل حوائط .. ليل ... وينهض ألف باب بيني وبينك تستبين كهولتي وتذوب أقنعة الشباب ماذا يقول الناس إذ يتمايل النخل العجوز سفاهة ويعود للأرض الخراب.... |
بيني وبينك الف باب وباب
وسور ممتد لفه الضباب وطيور تغني... الا ليت الشباب الم تعلم ان العمر زهورا تنتهي بعد الربيع ويموت العطر فيها وتذروها الرياح وهكذا العمرللدهر مستباح وللفناء متاح كالحلم يموت.... عندما تصحو في الصباح!! |
حاولت ادور لك شبيه حاولت ... لكني اتيه أتيه أتيه وشلون ابلقى للزمن ثاني او القى للشعر غيرك معاني او أقول اني عرفت بهالحياة أحد له مثل قلبِك قلب له مثل حزنِك حزْن له مثل فرْحِك فرْح له مثل مثلِك مثل |
لوللقلم روح وللورق احساس
ما جيت ارسم حروفي وازخرفها كانت لي عاده لـ جيت اكتب احبس الانفاس واطلق احاسيسي من محابسها وارتب المعاني على المقياس واكتب واكتب لين اجمع شواردها والفها بالورد واطرزها بالاماس وارسلها واهديها واسندها |
أنا مشكي من احزاني ولاذقت السعاده قط ومع هذا أحس الناس وأضحكها وأبكيها أنا واحد من العالم أنا جمله تحتها خط احاسيسي غريبه من بدايتها لتاليها أنا في صفحة الدنيا حروف ماعليها نقط حياتي مالقيت اللي يترجم لي معانيها |
ايه...يادنيا سقتنا مرها وعذب صافيها
مادامت على حال دوم في شيل وحط علمتنا دروس ... لكن مافهمنا معانيها ماجابه موج البحر يرميه على الشط نعشقها ونحبها... وتسكرنا بلاويها ولولا رحمة الله ماشفنا السعاده... قط |
طالب نصيحة، كني طالب أرقاب وهي نصيحة؟!كيف لو زوجوني؟ كنت أكتب لنفسي مشاريه وعتاب ولا ادري إن اللي قروني... قروني |
ياطلبين مني النصح تكفون فكوني
مانصحت نفسي وشلون بانصح الاجناب الوم نفسي واعاتبها بقسوه وبهوني لافايد فيها نصح ولا فايد فيها عتاب |
بالأمس مالي فالوجع طاري و لكنّ الهبوب هبت على صدري و هزت فيه ضلع ما يلين ما عاد هي لحية بكاء ساعه و فتح زرار ثوب لا والله الا حاجة لو جيت أبخفيها تبين |
نكتم صوت الوجع مخافة انه يبين
وان بان لبسناه من الضحكه ثوب وان سالنا وش بكم كن بالوجه شين قلنا حبة تراب ذرتها بالعين الهبوب |
بـ امالنا والأمنا نزرع أحلام وأيامنا تمطر مواجع علينا لا يوعدونا قالها فاتت أعوام نشرب قهر وأحزان من يوم جينا الضيم هربنا؟ على شان ننضام هذا قدرنا وش بقى في ايدينا |
الله وكيلك ماذخرنا شي بيدينا
كل مازرعنا ماجنينا غير الاوهام اقدارنا تمشي يمنا ولولها مامشينا ولوهربنا منهاماسلمنا تقول الوعد قدام |
مشينا فوق درب السهد والآلام والأحزان حيارى في خضم التيه ما ترسي مراسينا تباشير السعادة عن نظرنا لفها النسيان وفوق أهدابنا ماتت من الحسرة أمانينا |
الاماني الي ذابت كما الثلج في يدينا
بللت درب السهد ونبت في الاجفان وفي بحور الحيره ضيعنا مراسينا ويدينا.. ماعادلها على المجاديف سلطان |
بات في صدر الشقا والصبر وعزومه كفاحه عارف الأيام ما يسلم بن آدم من خطرها وجر صوته من صميم القلب وأعلنها صراحه لا بكا لام العيون ولاهدى قام وشكرها آه ياشين الحشيم اليا سقط وأعلن مطاحه لو عذر بعض الوجيه وجيه ناسٍ ما عذرها |
الله يكفينا شقا الدنيا وكدرها
ياكثرالشقا فيها وياقلة الراحه لو تسال ابن ادم عنها ماشكرها من كثرما سال دمعه ونزفت جراحه ان اقبلت له سامح خطاها وعذرها وان ادبرت عنه اشهر عليها سلاحه |
هذيك الليالي وين أثرالزمن دوار خذاها ولاظني زماني يرجّعها طوتها السنين ولابقالي سوى التذكار لياشافته عيني تسابق مدامعها |
الليالي قضّت مضاجعنا مواجعها
وشدت رحايلها وتركت بالعين تذكار لونادينا بالصوت ما اسمعتنا مسامعها مضت ومضينا وتصّرمت منا الاعمار |
رغم كل الظروف اللي تحيط بعالمي وتدور سرجت القاف والهاجس كتبت اليوم مسراحه على ذاك الطريق اللي يمر ويلتوي بالبور رحلت وخافقي تحت الضلوع احس بنياحه رحلت بعيد بأفكاري من اسباب العنا والجور ادور للحبيب الي رحل واحرمني الراحه |
هنا لـ الصمت صوت و حضن و انفاسٍ و عيون و روح
هنا لـ الحكي نبض وجل هنا لـ الصدر تنهيده هنا ياحضرة الكرسي تموت قلوب وتحيا جروح و لاتبرح مكانك لو يعيد الحزن بك عيده |
هنا ساقيت غصن من غلا كنا تحت ظله نسولف بالغنا يا بايع الدنيا وشاريها |
الغصن لامن تمايل غلا...سالت سواقيها
وينبت عشب الرضا وتزهروروده وفله |
هذا وانا لا قفيت روحي تخفّق ماكل مبلي نجدته من ذراعه ليتك بعد ماسرفت فيها ترفّق عيني على عينك تسوق الشفاعه ولا لعلك فالزمن ماتوفق وارفع معي لله كفوف الضراعه |
هكذا الدنيا تُرينا حزنها
مَنْ مِن الناس تخطاه الحرج !؟ لاتقل ضاقت ولكن قل غداً سوف يأتي منك يارب الفرج .. |
جينا ورحنا ثم رحنا وجينا بين الظما واللال والشمس والفي جينا وحنّا بالزمن ماهقينا أنه يخلي شي من شي لاشي نجمع شتات احلامنا مادرينا أن التعب مكتوب وأن الشقى حي |
ياحي من جيناه وجانا ياحيه من حي
عنينا له وعنينا العنا له وله تعنينا وله بالوصل وصلنا وماورا وصلنا شي ياكود تاكيد الغلا المؤكد باسمى معانينا |
الله من همٍ ليا جا يبى يبين أقول لا ياصدري إدفن دفينك لاتفرح عدايه علي والعذولين ولاتكثر الشكوى على مبغضينك كتبت لي من واقع الشعر بيتين وياشعر نزّل قيمتك كاتبينك |
كتبتك ياشعر في الهم بيتين
وياكثرهمك لو بحثنا كنينك اتعبتني ياهم في كتب الدواوين ولازلت اتفنن في كتابت عناوينك مرات اعجز في كتابتك حرفين ومرات اسكبك سيل يروي معينك |
كيف أبكتب والقلم حاله مريره..؟؟ وأنْ كتب يكتب .. ( بربي فاقدينك )..!! طالبك بس إذكري منهو مصيره هو مصيرك .. والعهد تذكر يمينك وإذكري من سّكنك بااقصى ضميره ساجنك والا الصحيح ... إنه سجينك |
كانت سوالفنا بضلعي لها أطناب
وليل الغلا لاجيت قمت وشعلته لبستك ايام الوله عطروثياب وبالي على أحضان اللقاكم شغلته تدري وش أصعب شي مابين الأحباب؟ إنه يهون بناظرك من جعلته: واحد ويسوى كل ربعك والأقراب والمستحيل الصعب لأجله فعلته |
هوجاس يقفي وهوجاس يجي مقبل اصبحت منجوم لا عارف ولا قادي الحزن بين الضلوع الاصعب الاسهل صعب تفاديه ولكن سهل يزدادي |
يا صاحبي كل(ن) يجود محله انا معك بالذات قلبي على طريف ٰ اليا حصل لي منك فنجال دلة والله لتبلش بي مثل بلشة حنيف |
| الساعة الآن 03:18 PM. |
Powered by vBulletin® Version 3.8.9
Copyright ©2000 - 2025, Jelsoft Enterprises Ltd.