الحمدالله اليوم اخر يوم محاكمه ادعولي انشاءالله افراج
اليوم راح اتكم عن نفسي بشكل مختصر
طبعا اعذروني راح يكون الكلام ملخبط شوي
وماهو مرتب يعني الي راح يطلع على بالي راح اكتبو
الفكره انكم تتعرفو علي اكثر الي حاب يعرفني
وارجع واقول مشكور اخوي زيدان على المايك
بسم الله الرحمن الرحيم
ابداعائلتي تتكون من اب وام الله يحفظهم ليا
وخمس اخوان ثلاث منهم اولاد واثنين بنات
واخر ولد جاه عمرو لسه 8 اشهر من ام ثانيه
يعني اخ لزقه
وانا ترتيبي الثاني بعد اختي الغاليه ام اثير
طبعا انا ولد في مكه اول ماجيت على الدنيا على طووول
نقلنا على جده بحكم عمل الوالد الي كان شغال
في( وزارة الداخليه) بجدة
نجي على طفولتي بحكم اني اول ولد بعد اختي
فكنت مدلع دلع يكفي عيد ميلادي كان على وقتها
مين يقدريسوي عيد ميلاد في مطعم الدلفين
الي كان في فندق العطاس وراح اختصرلكم
وضعي يعني بالعربي كنت ارضع من ملعقةذهب.
ندخل على مرحلة الدراسه الابتدائيه
كانت اول سنتين صعبه جدا علي بحكم ضعف
نظري الي سببلي مشاكل في الاختبارات وقتها
كانوالمدرسين يخلوني اول الصف واترك ورقة
الاجابه فاضيه لانوزمان كانو يكتبو الاسئله
على الصبوره مو زي دحين تقويم مستمر ودلع
المهم فكانو يستغربو مني لاني كنت
دافور يعني شاطر بعدين عرفو انو نظري ضعيف
جدابالعربي كنت شبه اعمى وكنت اركز
في الاسئله الين مااحس انو عيوني راح تخرج من مكانها وطبعا لبست نظاره وانا بعمر7 سنوات
الى الان وراح اذكرلكم موقف صرلي
بعمر 10 سنوات كنت احب العب كورره
كانت هيا حياتي
الى درجة اني كنت انام وهيا بحضني
طبعا وقتها الوالد كان يعرف
لاعب المنتخب والاهلي عشقي الابدي سابقا الكابتن محمد عبدالجواد
طبعا هو شاف لعبي وانبسط كثير
وقال هادا مستقبل الاهلي
مالت عليا قال مستقبل والله اني صرت الجزيره
المهم رحت النادي الاهلي واتمرنت مع الناشئين
واعجب بيا المدرب مررره المهم جيت للكشف
الطبي وهنا كانت الصدمه
اني ماعديت الكشف بسبب نظري
الضعيف والله كانت قمة الاحباط
وجاتني حاله نفسيه سيئه لانو حلمي قدامي
راح بس الحمدالله ماخليت دوري
في الحاره ولا المدارس الى شاركت فيه
بس انشاءالله البركه في ولدي يارب.
نجي للمرحله الثانويه
هادي المرحله نضجت فيها كثير غير عن اي
شاب لانو معروفه هادي المرحله تكون عز
المراهقه
الي انا ما مريت فيها اساسا بحكم اني كنت اشتغل
في هادي الفتره وقتها كان عمري 16 سنه
السبب لاني كنت اصرف على الوالده من ايجار
ومصروف لها وليا انا طبعا لانو الوالد
طلق الوالده وانا بعمر 12 سنه
صح انها فتره متعبه بس كانت رائعه جدا
لانها علمتني اشياء كثير وخلتني احتك
بعالم ثاني من طبايع البشر
وتصرفاتهم الي خلتني اعرف كيف اتعامل
مع عامةالناس وخلتني اعرف ابلور شخصيتي
واحدد ملامحي اتجاه الناس .
نجي لفترة الجامعه
وهيا احلى فتره قضيتها في حياتي
طبعا معروف دراسةالجامعه عندنا في جده
والله انها كلها هبقااات وفله مع الشباب
طبعا نا تخصصت ارصاد جويه لاتسالوني ليه
لانو وقتهاماكنت افكر في الدراسه لاني كنت ابغى
اكون جامعي وبس طبعا احلى شي مر عليا
في هادي المرحله اني اتعلمت الغوص في ماليزيا
وصرت عادة كل مااضايق ولا طفشان انزل
مع اصحابي لاعماق البحار
الى درجه انو الاسماك صارو يعرفوني هههه
زودتها شوي صح
طبعا مافي غنه عن الكوره الي ماخلت
في جسمي الى اتكسر وهات عمليات
المرحله الاخير من حياتي هيا التخرج والزواج
طبعا لمن اتخرجت على طوول جاتني وظيفه
في مجموعه بن لادن السعوديه
خلاص طبعا جات الفلوس في ايدي وصار
عندي حب الاسراف والسفر وبدت تبان
عليا سن المراهقه في هادي المرحله المتاخره
ماصرت اطيق جلست البيت من خرجه لخرجه
ومن سفر لسفر وطبعا صرت مقصر معاهم
بذات الوالده الي راحت اشتكت
للوالد طبعا هو ماعجبو وضعي على طوول
قالي لازم تتزوج بدل ماتخرب
علي في البدايه كنت معترض بس فكرت فيها
لقيت اني لازم اتزوج عشان بديت اغوص
في اشياء مو لازم تعرفوها
لايروح بالكم بعيد تراني مالي
في الدخان والمعسل والشيشه والقهاوي
وتبايعها لاني كنت انسان رياضي بحت
وبالفعل لقولي بنت الحلال واتزوجت ودحين عندي
ولداسمو بلال مااكذب عليكم نفسي
ارجع شويا لورا لاني مليت من الروتين
وحشتني حياة الغوص والسفروالهبقات
مع الشباب لانو لها طعم ثاني.
واهم شي حصلي في الفتره الاخير اني اشتركت معاكم في احلى منتدى
والى هنا نصل معاكم الى نهاية قصتي انشاءالله
تكون عجبتكم وقدرت اوصل شي في خلال
الثلاث ايام الي فاتت من مواضيع تعم بالافائده
ويارب تكون المحاكمه عليا بالا فراج وانا كدا
انتهيت
وراح اعطي المايك
لانسانه مالها كثير في المنتدى زي انا بس
ماشاءلله انطلاقتها كانت زي الصاروخ
واتمنى لها النجاح في المنتدى وهيا
الاخت انجال الغضى
ودمتم بود جميعا على الثلاث ايام وانشاءالله
مااكون اتاخرت عليكم وسلامتكم