أقماع بحشوة الدجاج ..

أقماع بحشوة الدجاج ..



المقادير والطريقه مع بعض / ..
اول شي نسوي الأقماع ..
من خبز التورتيلا
[ طحين + ماي ] واقفل الاطراف فيه
ونقطع الخبز لمثلثات مثل كذا

عقبها ناخذ كل مثلث ونلفه على شكل قمع وبالطرف نحط الخليط اللي قبنا بنقفل فيه " الطحين + الماي "
بوريكم صوره وانا حاطه الحطين قبل ألفه عشان توضح لكم الفكره
عقب مالفيته

بعدين ندخل كل قمع في الثاني ونحطه في حافظه عشان ماييبس ..

الحين نجهز الحشوه ..
بتكون 3 طبقات أساسيه
طبقة الدجاج / طبقة الخس / طبقة الجبن
بالنسبة لـ طبقة الدجاج ..
نسوي التتبيله حقت الدجاج وهي عباره عن :

[ علبة زبادي / 3 ملاعق كبيره صوص الـ Hp العادي / عصير ليمونه / فص ثوم صغير مفروم / ملعقه كبيره خل / شوية فلفل اسود / شوي ملح / شوي بهارات ] ..
بتلاحظون اني ماكثرت بهارات وفلفل اسود وملح .. لأني برجع احطهم مره ثانيه وقت الطبخ ..
نجيب 4 صدرو دجاج ونقطعهم لمكعبات صغيره ونخليها تتبل بالتتبيله اللي سويناها لمدة ساعه أقل شي ..
على ما تتبل نجهز الخس ..
نجيب خس ونقطعه لقطع متوسطه تقريبا
ونجيب 3 ملاعق مايونيز وملعقه كبيره عصير ليمون ونخلطهم معها ..

ونحطهم بالثلاجه لين نكمل باقي شغلنا
الحين نجهز الجبن
نجيب جبن ..

ونجيب فلفل احمر بارد .. ونقطعه لمكعبات صغيره ,
وبقدونس .. نقطعه لمكعبات صغيره بعد ,
ونضيفهم للجبن ..
( الفلفل والبقدونس اختياري .. )


الحين نجي للدجاج اللي تتبل ..
نجيب قدر .. والا مقلى .. بكفيكم ,
نحط فيه الدجاج مع التتبله ( بدون زيت بدون اي شي )
ونخليه على نار متوسطه لين ينشف من الماي اللي فيه ( الماي اللي بيطلع من الدجاج + الصوص حق التتبيله )
تقريبا بياخذ ثلث ساعه ,
لما ينشف نضيف عليه شوي زيت ..
ونقلبه دقيقتين ثم نضيف عليه بصله صغير مقطعه شرايح طويله ..
ونقلب لما يذبل البصل ..
ونضيف عليه مكعب ماجي ..
وشوي بهارات وفلفل اسود ,
وملعقتين كبيره معجون طماط
وعقبها نجيب فطر مقطع شرايح ..


ونضيفه على الدجاج ونقلب 5 دقايق ..
بعدها نضيف شوي كزبره مفرومه
ونقلب دقايق بس ونرفعها من النار ..
الحين نجيب الأقماع ونجيب كل شي جهزناه .. " حشوة الدجاج / الجبن / الخس "
ونحشي الأقماع بهالترتيب
اول شي طبقة دجاج
بعدين طبقة خس
بعدها طبقة دجاج
أخر شي طبقة الجبن
وهذا شكلها بالأخير

وبالهنا والعآآفيـــــة

م . ن