غير مسجل ضع/ي لنا أجمل رسالة أو صورة وصلت جوالك#

🌺 ،، انا امرأة وعندي بنتين ،، بعد ولادتي لهم قدر الله واصابني بمرض في رحمي اجبرني على انهم يشيلونه رغم عني واستسلمت لهالشيء وزوجي ساندني ودعمني ولا قصر بس كان يبي الولد اللي يرفع اسمه وهذا كان كل همه 💔 لما شفت رغبته الكبيره بهالشيء حسيت اني بظلمه لو استمريت معه وانا ما اقدر اجيب له الولد وبنفس الوقت احرمه من هالشيء اللي يقدر يسويه بلحظه ضعف وشفقه نصحته وليتني مانصحته 💔 وقلت له تزوج ومن هالكلام وثبتت هالشيء براسه وانا ناسيه ان الضره مره ولو كانت جره ! اخذ بنصيحتي وبكلام اهله وتزووج ومر علي هذاك اليوم مثل السم بصعوبه تقبلته وصرت طريحه الفراش بنفس يوم دخلته ،، وفعلا انجبت له زوجته الولد وفرح فيه كثيير ،، لدرجه اهمل بناته تقريبا اشتعلت نار الغيره بقلبي من هالمولود بالرغم من ان امه ماكانت تضرني بس طريقه اهتمامه وفرحته فيه حرتني بزياده خفت بناتي يكبرون ويشوفون فرق التعامل وتنكسر قلوبهم كبر هالولد وصار عمره سنتين وكبر الحقد اللي بقلبي عليه وعلى امه كنت ابي اطلعهم من حياتي وحياه بناتي باي طريقه ،، ندمت كثير على اللحظه اللي قلت فيها لزوجي تزوج ،، بعد فتره ماهي طويله توفى زوجي الله يرحمه بحادث سياره مع زوجته الجديده اللي هي ام الولد اما ولدهم ماكان معاهم بالسياره شلت هم كوني بصير ارمله وبرجع لبيت ابوي وبصير عاله عليه مرت علي ايام العزاء ثقيله ضعفت فيها حييل وهلكني التفكير بمستقبلي ومستقبل بنااتي ،، خاصه اني مابي اتزوج واتركهم ،، وبتكبر وتكبر مصاريفهم وهمهم معاهم وما عندي احد يسندني مثل رجال او شيء غير اخواني ربي يحفظهم لي ❤ بس يضلون مب بمكان الولد او الزوج ،، طول ايام العزاء كانت شغالتي ماسكه ولد زوجي مع بناتي وهي اللي تهتم فيه وتداريه واهل امه كانو على قولتهم مصدومين من وفاه اختهم فما قدرو يعتنون فيه ،، بعد اانتهاء ايام العزاء سمعت الطاامه الكبرى ! الخبر اللي حسيته كان غصه ومو راضيه تزول ،، اهل ام الولد ماقدرو يربونه ويحتوونه عندهم ،، بحجه ان امهم مريضه وماتقدر تراعي طفل وتنتبه له اما خالاته فكانو متزوجات وماعندهم استعداد يحتوون طفل ثاني ويتحملونه وولا وحده فيهم فتحت بيتها له ولا قدرو انه ولد اختهم !! ،، عماته كان لهم نفس رده الفعل وقالو خالاته يتحملونه وخالاته يرمونه على عماته ،، بالعربي محد راضي فيه او انه يستقبله كان في حاله تشتت فظيعه
كلموني خواتي وقالو ليش ماتربينه وانتي زوجه ابوه الله يرحمه وبمحل امه وهذا يتيم ومالك الا الاجر ومن هالكلام ،، تقبلت على مضض اني اربيه بعد ما اقنعوني خواتي انه ولد وبس يصير عمره 17 سنه بيطلع بحال سبيله ويستقل لحاله ،، واحسن له انه يسكن مع خواته ،، وافقت وتحملت مسؤوليته على مضض بس كنت افرق بينه وبين بناتي 💔💔 ،، معاملتي له كانت سيئه وواضح اني ما اطيقه وداايما اضربه هو ولا احن عليه او اهتم له ،، اتذكر حتى الحليب اللي اعطيه خواته يكون داافي اما هو يكون بارد ،، حتى اللحاف اللي يتلحفون به خواته ناعم اما هو يكون خشن ،، واي خطا بسيط يسويه حتى لو مايستاهل الضرب اضربه وما ارتاح الا لما اسمع صوت صياحه للاسف وصلت لهالدررجه 💔💔 ومستحيل انسى موقف كنت معصبه منه بصباح في الشتاء وخليته يروح مدرسته وهو مب متدفي وكان بسن صغييير ولا انبني ضميري عليه فتعب تعب شديد بعدها وكنت اخليه يروح بدون ما اعطيه خبزه او فلوس يشتري فيها الاكل ،، الغيره وماتفعل ،، كبر الولد ومعاملتي له كذا كبر وهو مكسور ومتحطم ،، كبر على ضربي له وعدم رحمتي وحنيتي عليه كبر ولا مره شاف مني معامله حلوه او حنيه عليه ،، وصل لعمر 14 سنه وبديت اشوف نفعته !! مع انه كان المفروض من يوصل 16 سنه خلاص يشوف حال سبيله بس الولد بهالسن صرت اشوف نفعته لي ولخواته ،، كان يدور رضاي باي طريقه ،، كان اكثر واحد نافعني من اللي حولي بدون اي مبالغه يسمع كلامي ولا يناقشني وكاني امه الحقيقيه محترررم لابعد درجه ولا انكر هالشيء رجعت اقول لنفسي اصبري كم سنه وبيخرب الولد وبيهيت بالشوارع كل هذا عشان ما يحن قلبي عليه ،، صار عمره 16 سنه ويتغطى عن بنات خواتي واخواني فصار ينام بالملحق وعايش هناك واكله اخته توديه له يعني بالعربي زي السواق ،، تحسبونه تحلطم ؟ ولا تشكى ؟ ولا لو مره طلعت منه كلمه سخط ؟
لا والله العظيم انه كان يدور رضاي ويكلمني بالاسلوب الزين وولا مره قال لي ليش تفرقين بيني وبين خواتي ،، مع اني توقعت انه يكبر ويقول كذا بس كان عقله عقل رجال ،، بدا يسوق وصار يودينا لكل المشاوير هو بنفسه ولا يخلينا نحتاج احد وحتى لو كان جالس مع اخوياه او مشغول يترك اللي بيده ويقوم عشاننا ،، كان عااقل لابعد حد يمشي بالسوق وعيونه بالارض عشان مايشوف البنات ،، رغم ان البنات يمدحون وسامته كثير بس عيونه طول الوقت بالارض ومايحب يتفرج باعراض غيره ولا خلاه هالشي يشوف نفسه ،، خواته ماكان عندهم غيره اخو او محرم فكان هو طول الوقت اللي يوديهم ويجيبهم بالمشاوير ويعتمدون عليه اعتماد تام وبالعكس اذا وحده من بناتي راحت مع خالها يضيق عليها ويقول انا ليش موجود هنا ومن هالكلام ،، بعد ماشفت موقفه معنا ونفعته لي ،، يعني تقريبا اخواني ماقصروا بس مايهتمون فيني وانا معاي هالبنتين ولا يسالون عن اخباري ووش محتاجه رغم اني ارمله بعد بس بالعكس حتى المشاوير معاهم كانت بعد حب الخشوم والترجي ،، بس ولد زوجي اغنانا عن الكل يوم كبر وصارت عنده سياره ،، المهم بعد ماشفت نفعته يوم كبر بدى قلبي يحن عليه وضميري يانبني بسبته واني مخليته بالملحق قررت اني اطلع من بيت ابوي لشقه لحالي انا وبناتي وهو ،، بما انه محرمنا فهالشيء عادي ،، بعد ما كنت قاسيه عليه وافكر اني اخليه يروح بحاله بعمر 16 طلعت انا عشانه من البيت وسكنت بشقه صغيره معه ومع بناتي ،، والله العظيم انه زي ولدي واعظم لي من الولد ،، حتى لو عندي ولد يمكن مايسوي لي كذا
صار اول مايدخل الشقه يحب راسي ويدي
وقبل مايطلع منها يحب راسي ويدي بعد ،، يعني حتى بناتي بنفسهم ماسوو لي كذا ،، صار هو رجال البيت وهو اللي يسوي كل شيء نحتاجه ،، فاادني اكثر مما فادوني اخواني واللي حولي ،، الحين عمره 25 وتخرج ،، وتعرفون عاد البنات الله يهديهم مايسولفون معي واجد مع بعض ،، بالصباح قبل مايطلع لدوامه يجلس يسولف معي ويوسع صدري ويحب راسي ويدي وبعدها يطلع ،، يعني حتى لو عندي ولد ماسوا كذا ،، كل ما اكلمه حول الزواج يمسك يدي ويقول اخاف تجي وحده وتشغلني عنكم وتحتاجوني ولا تلقوني ،، ولا اخاف اتزوج وحده وتعاملك بسوء ،، الولد اللي ما كنت اهتم اذا متدفي ولا بردان ،، تعبان ولا بخير ،، جوعان ولا شبعان ،، هو نفسه اللي يقول لي كذا !! ،، ندمت اشد الندم على هذيك الايام ودي ترجع واعوض كل شيء ،، وتوه معتمر فيني الله يحفظه وحقق امنيتي هو بنفسه ❤ ،، انا راحت مني الفرصه اني اعوضه بصغره واكون بمكان امه ،، لكن والله العظيم لو يرجع يوم واحد بس عوضته عن كل شيء وحاربت الكل عشانه ،، ودي احب راس خواتي يوم نصحوني اربيه والله ان كل يوم قضاه عندي مهوب حسوفه ،، ماخلاني انا وخواته نحتاج احد صار رجال البيت وباار فيني ويشوفني مكان امه وولا مره سمعني كلمه تضايقني واعتمر فيني ،، لو عندي ولد ماسوا لي كذا والله ،، كل ما اقوله حلفتك بالله مسامحني ولالا يقول انتي بمحل امي ولولا انك احتويتيني كان يمكن انا الحين بدار ايتام او صايع بالشوارع وهالمعروف منك يكفيني والله يقدرني وارده لك
نزلت قصتي عشان تكون عظه وعبره لكل اللي تفرق بين عيالها وعيال زوجها وخاصه لو كانو ايتاام ياناس ماتدرون مين اللي بينفعكم بعدين ،، ماتدرون مين اللي بيقوم فيكم ويداريكم ويهتم لكم ،، مهوب استنقاص لعيالكم بس خافو ربكم بالايتام ولا تسوون سواتي اعمتني الغيره 💔💔 ،، تذكرو حديث انا وكافل اليتيم في الجنه يعني تربيه اليتيم لها فضل عظيم فما بالك لو كان من اقربائك 🌺❤ ،، خافو الله في الاطفال اللي عندكم لانهم خُلقوا ابرياء وبدون ذنب 🌺 وسبحانك اللهم وبحمدك اشهد ان لا اله الا انت استغفرك واتوب اليك ❤،،